La firma Kieswerk Oldis SA a Haldenstein surpiglia la firma Battaglia Beton da Tusaun - quai retroactiv sin l'entschatta da l'onn.
Tras questa cumpra possian ins schlargiar l'intschess da martgà da la gruppa Oldis. La firma Battaglia Beton furnescha products da betun en spezial en las regiuns Viamala e Plaun. Cun cumprar l'interpresa vegnia er surpiglià il persunal da l'ovra. La gestiun, l'administraziun e la facturaziun vegnan integradas en l'organisaziun existenta da l'ovra da glera Oldis, ha communitgà la firma Kieswerk Oldis. Il pretsch da cumpra na vegn betg communitgà.
Cun surpigliar l'ovra da betun a Tusaun schlargian e cumpletteschian els il territori da martgà da la gruppa Oldis, hai num. Ensemen cun las firmas affiliadas Ovra da glera Ela SA en il Surses e Bravuogn/Filisur possian ins furnir products da betun en l'entir Grischun dal Nord e Grischun Central.
RTR novitads 11:00