Siglir tar il cuntegn

Header

cuntegn

Oz stoni serrar da mezdi Cafés a Cuira han sentì la malsegirtad

Il venderdi aveva la regenza communitgà las mesiras per la gastronomia – ina sfida. Per exempel per ils cafés a Cuira.

Il Café Maron ed il Café Merz eran la sonda – il davos di ch'è anc betg stà pertutgà da las novas restricziuns – bain anc pulit emplenì. In café in zichel pli pitschen, il Café Patschifig, n'ha dentant gia lura gì quasi nagins giasts pli. Per ils cafés hai gì num, da sa preparar sin quai che spetga.

La regenza grischuna aveva numnadamain communitgà tar lur conferenza venderdi suentermezdi suandantas mesiras per la gastronomia:

«Hotels ed ustarias dastgan restar averts cun restricziuns: garantir standards d'igiena pli auts, almain 1 meter distanza tranter las maisas ed almain 4 meters quadrat spazi per giast. Ustarias che na servan betg ston serrar.»

Malsegirtad, dentant er speranza

La situaziun è per tut ils trais cafés ina fitg speziala. Il Café Patschifig n'ha per exempel anc betg pudì dir, quant ditg ch'els pudessan insumma tegnair avert il local. Il Café Maron aveva planisà da serrar l'auzada sura ed era il Café Merz duvrava midadas. Ins emprovia dentant da restar positiv e speria che quai temp da crisa passia svelt:

Ina malsegirtad è avant maun, nus restain dentant optimistics.
Autur: Regula Alamandpossessura Café Maron

Dumengia saira ha la regenza grischuna lura schlià la malsegirtad cun decretar che l'entira gastronomia ha da serrar – en mintga cas ils locals, nua che clients sa radunan. Servetschs da furniziun èn vinavant pussaivels.