Siglir tar il cuntegn
Inhalt

Ulteriur Grischun Panaduz duai survegnir ina nova halla

La halla polivalenta veglia da Panaduz na porscha betg pli avunda plaz e n'er betg avunda capacitad. Perquai ha la vischnanca previs ina nova halla polivalenta dubla en grondezza da turnier.

Panaduz duai survegnir ina nova halla plurivalenta.
Legenda: Panaduz duai survegnir ina nova halla plurivalenta. RTR, Sandra Carisch

La halla polivalenta da Panaduz è quasi adina occupada. Las scolas e numerusas uniuns nizzegian ella. Perquai ha la vischnanca decidì da bajegiar ina nova halla in zic pli gronda che l'actuala. Quai gist sper la halla existenta.

Cunzunt las uniuns da sport han dentant il basegn d'ina halla anc in zic pli gronda, numnadamain ina halla dubla en grondezza da turnier. Vul dir: Enstagl da la halla previsa da la vischnanca da 28 sin 20 meters duai dar ina halla da 30 sin 24 meters. Perquai hai dà ina petiziun.

Vischnanca prenda si il giavisch

La vischnanca ha suenter discussiuns cun las uniuns, ch'han tenor Janine Bergamin, ina da las petiziunarias, giu da prestar blera lavur da persvasiun, lura prendì si quest giavisch. Sch'i vegnia gia bajegià ina halla saja bun sche las uniuns, che dovran lura er ella, èn er cuntentas cun la halla, uschia Elita Florin, presidenta communala da Panaduz. Perquai è uss la varianta en grondezza da turnier sin maisa.

La radunanza da vischnanca ha d'approvar il credit da planisaziun da 500'000 francs ch'è integrà en il budget da l'onn proxim. Pir suenter vai lura per il credit da construcziun. La vischnanca quinta cun custs da radund 12 milliuns francs.

RR actualitad 08:00