La partida burgais democratica (PBD) vuleva ch’il cussegl da la citad introduceschia scolas bilinguas englais-tudestgas. Il parlament ha uss refusà cleramain questa incumbensa. Quai na saja betg necessari d’introducir talas scolas bilinguas cun englais. Pli impurtant saja da guardar ch’ils uffants emprendien endretg lur emprima lingua ha ditg Patrik Degiacomi il cusseglier da la citad responsabel.
«Invetntx» survegn il dretg da bajegiar
Il parlament da Cuira ha decidì unanimamain da surdar a la firma «Inventx» il dretg da bajegiar sin l’areal dal anteriur lavuratori forestal en il center da la citad da Cuira. Questa firma vul engrondir sia sedia e construir in nov bajetg.
En il futur vul la firma d'informatica porscher 200 plazzas da lavur a Cuira. En il bajetg duain alura er avair plaz pliras abitaziuns ed l’archiv da la citad. La «Inventx» porscha tranter auter servetschs dad IT per bancas.
Ils 21 da matg sto il suveran da Cuira decider definitivamain sche la «Inventx» duai er propi survegnir il dretg da bajegiar.
Nagin sistem electronic
Gist tar questa votaziun ha quai dà irritaziuns. Il resultat final era alura 13:5 uschia che quai na dat nagin sistem electronic per las votaziuns en il parlament da Cuira.
RR novitads 17:00