La citad da Cuira sustegna la renovaziun totala da la plazza per atletica leva a Landquart. Il parlament da Cuira ha concedì oz ina contribuziun da 750'000 francs. I na saja betg raschunaivel da bajegiar in'atgna plazza d'atletica leva, sch'i existia gia ina buna en la vischinanza. Quai ha ditg il president da la citad da Cuira, Urs Marti.
Entras il sustegn finanzial survegnan Cuira e sias uniuns il dretg da nizzegiar durant 14 uras l’emna la plazza d’atletica leva a Landquart.
Material da votaziun prefrancà
Ultra da quai ha il parlament da Cuira decidì unanimamain, ch'ils votants e las votantas da Cuira pon en l'avegnir vuschar gratuit. Els na ston uschia betg pli francar sezs la cuverta da vuschar, sch'els returnan quella per posta. La proposta era vegnida da la Partida populara.
