Siglir tar il cuntegn
cuntegn

Ulteriur Grischun Parlament giuven: Cumposts en ils parcs da Cuira

Cunzunt ils dus temas persistenza e sortida han fatschentà ils 15 preschents. La fin dal di han els lura surdà tschintg propostas al parlament da la citad.

Normalmain è la media da vegliadetgna pli auta.
Legenda: Normalmain è la media da vegliadetgna pli auta. RTR, Gian-Marco Maissen

Sco emprim han ils giuvens preschents pudì discutar cun persunas sco per exempel da la Polizia da la citad u cun il president da la citad Urs Marti. Là han els pudì far lur dumondas ed er inoltrar giavischs e criticas ch’èn gist vegnidas respundidas. Londerora han els lura pudì sviluppar lur ideas tge midadas ch’ins pudess proponer al parlament da la citad.

5 propostas questa giada

Tut en tut ha il parlament giuven surdà tschintg puncts al parlament da la citad:

  • Cumposts en ils gronds parcs da la citad
  • In obligatori da cups reutilisabels enstagl da cups da bittar a la festa da Cuira
  • In concept per ina campagna cunter mulestas sexualas en bars e discos a Cuira
  • La polizia na duai betg pli numnar las naziunalitads en communicaziuns da medias
  • Stritgar il scumond da betg pudair baiver alcohol la saira en parcs e sin bancs

Evergreens sortida e reciclar

Gia l’onn passà ha il parlament giuven da Cuira proponì in sistem da reciclar en ils parcs. Quel n’ha dentant gì nagina schanza. Era la sortida saja omnipreschenta. La pledadra dal parlament giuven Gianna Fetz declera che quai sajan oramai era puncts che sajan adina actuals. Puncts sco la fusiun da Cuira e Haldenstein sajan be curt actuals e suenter betg pli. La sortida e l’ambient restian adina puncts da discussiun.

Idea – dar als giuvens vusch e plattafurma

L’idea dal parlament «vegl» è stada il 2014, da pudair animar ils giuvens da daventar activs cun atgnas ideas e tematicas en la politica da Cuira. Perquai han ins instradà il parlament giuven da Cuira. Quel s’inscuntra regularmain per elavurar ideas, moziuns ni petiziuns. La citad da Cuira sustegna il parlament cun maximalmain 10’000 francs per onn.

RR novitads 12:00