Ina da las finamiras centralas da la promoziun tempriva dal tudestg è ch’ils uffants chapeschian tudestg, fin ch’els arrivan en scolina. Quai saja essenzial per la furmaziun scolastica, manegia il cusseglier da la citad da Cuira, Patrik Degiacomi.
Nus lain che tut ils scolarets san uschè bain tudestg ch’els chapeschan il scolast!
Blers esters en las classas
Passa 35% dals scolars a Cuira n'han betg tudestg sco emprima lingua. E betg en tut las classas hai tuttina blers esters. En in pèr quartiers abitan dapli esters ch’en auters. La scolina en il Rheinquartier ha tenor Degiacomi per exempel passa 90% esters en classa.
Avant ch’els hajan entschavì cun quest program il 2014, na chapivan passa 20% dals uffants betg la mussadra da scolina, declera Patrik Degiacomi.
In model ch’è sa cumprovà
80% da las famiglias ch'èn vegnidas envidadas a quest program da promoziun, han prendì part al program ch'è fin la stad 2020 anc voluntari. E las famiglias, ils uffants, ma era l'uffizi èn fitg cuntents cun il program.
Il model è ina collavuraziun cun l’Universitad da Basilea. Era a Basilea datti gia quella promoziun dal tudestg. E Patrik Degiacomi di che autras citads, sco per exempel Lucerna u Berna, sajan s'interessadas per il program.
RTR actualitad 07:00