Siglir tar il cuntegn

Header

cuntegn

Pesticids Aua da baiver – Domat controllescha clorotalonil

L’emprim la buna nova: Ils da Domat pon baiver senza resalvas lur aua da spina – era sch’in'emprova ha mussà valurs sin il cunfin dal lubì.

In postulat ha pretendì da mesirar clorotalonil – u meglier ditg ils products da decumposiziun da quest pesticid. L’emna passada ha la suprastanza rapportà davart las examinaziuns en las duas tschiffadas d'aua sutterrana.

Tge è clorotalonil

Textbox aufklappenTextbox zuklappen

Clorotalonil è ina substanza activa che vegn duvrada en l'agricultura dapi ils onns 1970 sco fungicid. Quai cunzunt per proteger graun cunter diversas malsognas.

L'Uffizi europeic da segirezza alimentara ha constatà la primavaira ch'ils products da decumposiziun da clorotalonil pon periclitar la sanadad. Damai che las substanzas pon chaschunar cancer, è il diever da quest fungicid dapi l'entschatta da l'onn scumandà en Svizra.

Ils resultats sajan tut en tut cuntentaivels, sco la postulanta Anita Caflisch Müller di. Ina emprova cuntanschia dentant la valur maximala da quai che la Confederaziun lubeschia.

Quai ha fatg vegnir nus alerts.
Autur: Anita Caflisch Müllermedia da chasa e parlamentara da Domat

Uss dovria quai mesiras. La pli impurtanta mesira haja il Cussegl federal gia prendì cun scumandar l’adiever da clorotalonil a partir da l’entschatta dal 2020. Sin plaun communal stoppian ins tegnair en egl la chaussa e controllar vinavant las valurs en l’aua sutterrana, di la parlamentara da Domat.

La chanzlia communala da Domat conferma ch’ins cuntinueschia las mesiraziuns e controlleschia vinavant las valurs da clorotalonil, respectiv da ses products da decumposiziun.

Clorotalonil po probabel chaschunar cancer

Clorotalonil vegnia qualifitgà sco cancerogen – vul dir ch’i chaschunia probabel cancer, di il chemicher chantunal Matthias Beckmann. Tar questa conclusiun vegnian tant autoritads europeicas sco er svizras ch’èn responsablas per la segirezza alimentara.

Damai ch’il pesticid saja in cancerogen, stoppian ins partir da quai anora, ch’er sias substanzas da decumposiziun possian chaschunar cancer.

Il problem na saja dentant betg liquidà cun scumandar clorotalonil, di Matthias Beckmann. Il pesticid saja fitg persistents e restia ditg en il terren u en las auas sutterranas. Perquai lauda il chemicher chantunal las stentas da Domat da tegnair en egl las valurs da clorotalonil e da ses products da decumposiziun.

Sa fatschentar cun ils ristgs da pesticids è il duair dals provediders d'aua
Autur: Matthias Beckmannchemicher chantunal

Ord l'archiv:

video
Clorotalonil scumandà per immediat
Or da Tagesschau dals 12.12.2019.
laschar ir

RTR actualitad 12:00