Il matg, zercladur e fanadur èn bels mais per maridar. Per insaquants pèrins na daventa quest plan dentant betg realitad. Pervi dal coronavirus n'èn reuniuns cun pli che tschintg persunas betg lubidas. Bleras nozzas vegnan perquai spustadas.
Quietar, dar tips e far speranza
Spustar ina nozza, quai vul dir telefonar bler, sclerir e coordinar. Uschia di Oliva Derungs, planisadra d'events professiunala cun firma a Cuira. Blers pèrins – er quels ch'han sez planisà tut la nozza – dumondan per sustegn e tips «dals profis».
Nus avain intgins ch'èn en panica e lura ston ins empruvar da calmar els in pau.
Che la nozza stoppia vegnir spustada, na saja betg simpel per in pèrin. Uschia emprovia ella er da dar curaschi per il proxim temp.
Situaziun malsegira
Per il mument ha la planisadra d'events anc avunda da far. Ella tema pli per temp suenter la crisa da corona cun la branscha d'events.
Mumentan na savain nus betg propi co i va vinavant il proxim temp e tge ch'è pussaivel.
Fin cura che la regla da tschintg persunas vala anc, saja ina da las intschertezzas. Vinavant dependia er, quant che pèrins, fatschentas privatas u persunas privatas vulan suenter la crisa insumma investir en events. Fin che la branscha sa revegn puspè, vegnia anc a durar in pau, manegia Olivia Derungs.
2021: in onn da nozzas?
Blers pèrins spostan las nozzas gist per in onn entir. Uschia pudess l'onn 2021 vegnir in onn cun dapli nozzas. Vinavant haja la situaziun extraordinaria per il mument er in'influenza sin las relaziuns.
Temp da crisa po er rinforzar las relaziuns. Quai vul dir, ch'i dat forsa er novas nozzas vitiers il 2021.
Quai saja dentant be speculaziun, fa Olivia Derungs attent.