Plazzal e fiera da Nadal – Va quai?

Tenor il cusseglier da la citad da Cuira e schef dal departament da bajegiar, Tom Leibundgut, va quai senza problems.

Laschar ir video «Plazzal e fiera da Nadal – Va quai?»

Plazzal e fiera da Nadal – Va quai?

1:39 min, Actualitad video dals 28.11.2017

Il mument marschi mordio sin ed enturn il Postplatz a Cuira. D'ina vart sa chatta dapi l'avust il plazzal en la Grabenstrasse. Là vegn sanada la via e tut las lingias da chanalisaziun e gas. Da l'autra vart vegn actualmain preparà per la fiera da Nadal.

Tenor il cusseglier da la citad e schef dal departament da bajegiar, Tom Leibundgut, va quai però senza problems in sper l'auter. Il plazzal en la Grabenstrasse vegnia schlià sin la fin da quest'emna. Uschia possian ils autos puspè cursar sin omaduas varts.

Il plazzal sin il Postplatz tar il curtin dal Calanda saja a fin sin l'entschatta da l'emna che vegn. E la fiera cumenzia la fin da l'autra emna. Las lavurs giajan tenor plan ed uschia giaja er tut sco planisà e senza problems.

Segunda etappa la primavaira 2018

La primavaira vegn lura anc sanà il segund vial da la Grabenstrasse. Questas lavurs sajan però bler pli pitschnas e na vegnan tenor il cusseglier da la citad betg a cuzzar uschè ditg.

Plinavant vul la citad er colliar la via da la posta e la via da la staziun cun ina sulada da crappa. Pia, ils peduns pudessan gia il 2018 traversar la Grabenstrasse sur la medema crappa che cuvra oz gia il Postplatz. Il chantun n'ha però anc betg dà la lubientscha per questa cuvrida.

RR actualitad 07:00