Durant quest temp da crisa ha er la Polizia da la citad da Cuira stuì metter prioritads e far adattaziuns. Ina da las prioritads è da mussar dapli preschientscha – quai sin plazzas e parcs ubain sin lieus neuralgics da la citad. La finamira: mussar ch'ins è qua per la populaziun. Plinavant era per respunder dumondas che vegnan en connex cul cumportament uss durant questa situaziun extraordinaria.
Era per la polizia valan las mesiras actualas
Adina dus policists furman ina patruglia. Quellas en in gir a pe ubain cun l’auto. Era per las patruglias vala da tegnair en la distanza da dus meters. Pervi da quai en els era en gir cun dus autos – mintgamai in policist en in auto.
Centrala provisorica
Per minimar il privel che tut la polizia vegn infectada, sch'in policist ha il virus, è la polizia vegnida partida en dus squadras. Ina è staziunada en la centrala principala en la citad e l’autra en la centrala provisorica sin l’Obere Au. Quella centrala è vegnida installada en il stabiliment dal club da boccia da Cuira.