Ditg n'è betg pli vegnì ballà sin il parchet dal Selig, in club da ballar en il Welschdörfli. Il manader Roni Szepanski sa legra da puspè pudair avrir las portas. Dentant....
Jau hai dubis che mintgin che vul, survegn entaifer quest curt temp in certificat.
In certificat survegnan persunas ch'èn vaccinadas duas giadas, ch'èn guaridas u ch'han fatg in test negativ per exempel en in'apoteca. Ils certificats d'in test valan 48 uras. Gist là ha il manader dal Selig ses dubis. Plinavant n'è el betg segir, sche tuts che vulan ir a ballar san, ch'els dovran in certificat.
Spetgar pli ditg cun avrir il club na fiss dentant betg vegnì en dumonda. Sch'ins haja la schanza, stoppian ins nizzegiar ella, manegia Roni Szepanski. Organisar persunal, bavrondas e glieud da segirezza entaifer curt temp saja dentant stà ina sfida.
Nagins certificats, dentant pli paucas controllas
In pau auter è la situaziun tar la vischina dal Selig, la Twelve-Bar. Quai è plitost in lieu per ir a baiver – tuttina vegn normalmain er ballà e chaminà enturn en la bar. Il proxim temp ston dentant tuttas e tuts restar sin lur sutga. Johanna von Ott, la manadra da la bar, na vul betg ch'insatgi na po betg vegnir en sia bar, mo perquai ch'el n'ha nagin certificat. Fin ch'ils certificats n'èn betg pli obligatorics, vegnan ins a stuair seser en sia bar.
Ella sa legra plitost d'avair pli paucas restricziuns: A partir da la sonda na datti per exempel nagina limita da persunas vid ina maisa. I spargnia bler temp, sch'ins na sto betg far «Tetris cun gruppas», manegia Johanna von Ott.