Premi Norman Foster va al Grischun Daniel Ladner

Grond'onur per l’architect grischun Daniel Ladner dal biro d'architectura Bearth & Deplazes: El po prender encunter il premi solar renumà Norman-Foster a Genevra. Quai per ina chasa da famiglia ch'el ha realisà a Tumein/Tamins. Quai scriva la Südostschweiz.

Ina chasa aparta cun in tetg furmà cumplettamain da panels solars. Bild in Lightbox öffnen.

Legenda da maletgs: La chasa premiada sa chatta a Tamins a l'ur da vischnanca e spazi verd. mad

L'architect grischun survegn il premi renumà Norman Foster per il project dad ina chasa da famiglia a Tumein/Tamins. Il premi va mintg'onn al project che riva da cumbinar da maniera la pli estetica l'architectura e la producziun d'energia solara.

Sursiglir cuntegn supplementar

Agentura solara Svizra

Ella è l'inizianta dal premi ed è vegnida fundada il 1990. Dapi lura promovia l'agentura l’idea dad avair en mintgina da las radund 3’000 vischnancas svizras almain in indriz solar che producescha tranter 1 kW e 10 MW energia. Per propagar l’idea haja ella lantschà il premi solar svizzer, scriva l'agentura sin pagina en la rait.

Sper Premi Norman Foster dus ulteriurs premis solars en Grischun

Sper la chasa da Daniel Ladner vegnan onurads anc dus auters projects cun in premi solar svizzer: Numnadamain l'edifizi da la Caotec Naturtechnik a Brusio e la chasa da pliras famiglias Hächler a Cuira.

Quests dus projects vegnan premiads en la categoria edifizis cun la distincziun per edifizis tenor il standard da «PlusEnergieBauten PEB».

Premis solars en trais categorias

La premiaziun da persunas u projects solars innovativs ha lieu quest onn per la 27avla giada. Sper ils Norman Foster Solar Awards datti ils premis solars svizzers en trais differentas categorias: En la categoria persunalitads u instituziuns per tgi che promova l’energia solara da maniera speziala, en la categoria edifizis per fabricats novs, sanaziuns u fabricats tenor il standard da «PlusEnergieBauten PEB» ed en la categoria indrizs per producziun d’energia.

RR novitads 06:00