Siglir tar il cuntegn

Header

Purtret da Landquart e la zona d'industria.
Legenda: Il project «Riedpark» ch'era stà planisà a Landquart na vegn betg realisà. RTR/Seraina Derungs
cuntegn

Ulteriur Grischun Project «Riedpark» a Landquart na vegn betg realisà

La suprastanza communala da Landquart ha decis da betg pli persequitar il project Riedpark ch’avess prevesì ina halla da sport cun radund 2’500 plazzas da seser, pliras gardarobas sco er in simpel hotel cun radund 80 chombras.

Sco Sepp Föhn, il president communal da Landquart, ha ditg al schurnal regiunal grischun da radio SRF, dovra Landquart urgentamain ina halla da gimnastica gronda. Las sis hallas da gimnastica sajan numnadamain occupadas permanent e la dumonda saja gronda.

Las examinaziuns pli exactas hajan uss mussà che la realisaziun sa retardeschia, e las contractivas vegnian era adina pli cumplexas. La suprastanza deplorescha da stuair sistir il project. I fiss bain stà ina schanza per il svilup economic en la regiun ed avess purtà dapli utilisaders er al «Forum im Ried».

In «nov» project ord la chaschutta

Uschia è era l’idea per in center naziunal d’unihockey a Landquart betg realisabla. Uss examinescha la vischnanca da Landquart in vegl project dal 2010 che prevesa ina halla nova sin l’areal da la scola superiura Ried.

Manchentà ina schanza, manegia Alligator Malans

Trumpà da la decisiun è This Störi, il president dal club d’unihockey Alligator Malans. Tenor el fiss la nova halla cun tribuna stada in enritgiment per il Grischun ed avess purschì a ses club in’infrastructura adequata per pudair giugar en la liga la pli auta da la Svizra.

RR novitads 14:00

Dapli da Grischunavrir la Landingpage

Nach links scrollen Nach rechts scrollen