Tranter auter pretenda l'uniun ina meglra repartiziun da las incumbensas tranter vischnancas, regiuns e chantun davart la purschida e la protecziun dals bains culturals. I haja duvrà ditg, ma ussa vegnia quai concret, scriva l'uniun Museums Grischuns.
Nov appell, vegl giavisch
L'uniun tetgala da 80 museums e 15 archivs culturals cumbatta gia dapi onns per dapli sustegn. Il 2007 ha il Cussegl grond surdà a la regenza in'incumbensa dal deputà Martin Montalta (Glion). En lezza vegniva pretendì ina revisiun parziala da la lescha da cultura.
Cura che questa revisiun fiss plaunet stada sin maisa, ha il Cussegl grond surdà a la regenza ina nova incumbensa (dal deputà Bruno Claus da Cuira). En questa vegn pretendì ina revisiun totala da la lescha.
Quest midament haja natiralmain mess sutsura il plan da la regenza, di Martin Jäger. Il mument saja il departament vidlonder d'elavurar il sboz da lescha.
Sboz anc quest onn en consultaziun
Anc quest onn quinta el da pudair trametter quest sboz en consultaziun. Jäger quinta ch'il Cussegl grond po tractar la lescha anc durant la legislaziun actuala che dura fin il 2018.
Ina finamira da la nova lescha da cultura stoppia esser da sclerir las cumpetenzas tranter vischnancas, regiuns e chantun, uschia ha ditg il minister da cultura grischun.