Il concern ch’è spezialisà sin producir polimers, ha fatg l’onn 2014, sco gia communitgà il favrer passà, in gudogn da record da bunamain 349 milliuns francs.
Dividenda e bunificaziuns
Ils passa 2’000 acziunaris han approvà tut ils puncts ch’eran sin la glista da tractandas. Tranter auter era quai ina dividenda da rodund 280 milliuns francs, tge che munta 12 francs per aczia. In ulteriur punct eran las bunificaziuns da 644‘000 francs per il cussegl d’administraziun, e passa 2,6 milliuns francs per la direcziun generala.
La candidatura Martullo-Blocher
In tema ch’è è vegnì menziunà a l’ur da la radunanza generala è la candidatura per il Cussegl naziunal da Magdalena Martullo-Blocher, la scheffa dal concern. Martullo-Blocher n’ha betg dà intervistas il di da la radunanza generala.
Acziunaris n'han naginas resalvas
Tuttina è la dumonda averta tge ch’i muntass per la Ems Chemie, sche sia scheffa vegniss elegida. Il tenor tar las acziunarias ed acziunaris da la Ems Chemie ha laschà sentir, ch’els n’han nagut encunter la candidatura ed ina eventuala elecziun da Martullo-Blocher. Quai funcziuneschia bain en ina, ed ultra da quai sajan las substituziuns gia planisadas.