Siglir tar il cuntegn
Inhalt

Ulteriur Grischun Recurs impedeschan svilup da la citad da Cuira

Il Tribunal Federal a Losanna ha abolì il permiss da lubientscha per il center da cumpra Wiesental a Cuira. Quai è mo in dad intgins projects pli gronds ch’èn bloccads il mument pervi da recurs. Tge di il la citad da Cuira da la situaziun mumentana?

quartier e turs da city west
Legenda: Plirs projects gronds per sviluppar la citad da Cuira èn sistids tras recurs. Keystone

Senza recurs dessi en il futur a City West in kino modern cun otg salas e radund 1'300 plazzas, in center d'asil per 180 persunas a Meiersboden ed ina punt d'atschal per peduns e velos, per sviar il traffic dal Welschdörfli.

Che tants projects gronds sajan bloccads na frustreschia betg, di Tom Leibundgut, cusseglier da la citad da Cuira e schef dal departament da bajegiar envers RTR. Ses departament quintia gia ch'i dettia mintgamai recurs tar projects pli gronds e sch'i na dettia nagin, sajan els surstads.

Motivs

Il spazi da viver vegn pli stretg, dapli persunas vivan sin spazi pli pitschen. Cunquai dettia era dapli recurs, cun quai stoppian ins viver. Ultra da quai sto la citad da Cuira sa fatschentar cun in terz dapli dumondas da lubientscha che avant onns. Ed ils burgais reageschian pli spert, perquai ch’els hajan svelt il sentiment ch’els vegnian dischavantagiads.

La glieud giuditgescha svelt persunas, chaussas, senza avair il maletg cumplessiv.
Autur: Tom LeibundgutSchef dal departament da bajegiar da Cuira

Sco schef dal departament da bajegiar a Cuira stettia el, dentant er il cussegl da la citad gugent a disposiziun per tut las dumondas. Quella schanza stuessi vegnir utilisada pli savens.

RR actualitad 07:00