Siglir tar il cuntegn

Ulteriur Grischun Regenza vul HTW sin areal Pulvermühle

La scola auta da tecnica ed economia HTW duai survegnir in nov center sin l'areal Pulvermühle. La regenza grischuna propona al Cussegl grond da realisar quest center e d'approvar las investiziuns da 125 milliuns francs. Sche tut va optimal alura pudess il nov center da scola esser realisà il 2025.

La HTW Cuira duai vegnir realisada sin l'areal da la Pulvermühle.
Legenda: La HTW Cuira duai vegnir realisada sin l'areal da la Pulvermühle. Keystone

Sco la regenza scriva quinta ella che la Confederaziun contribuescha 30 milliuns francs e che la vendita d'immobiglias da la HTW importian 5 milliuns, uschia ch'i resta al chantun anc 90 milliuns francs. Ils daners duajan vegnir mess a disposiziun ordaifer las investiziuns nettas dal chantun ed ì duai vegnir furmada ina reserva sin donn e cust dal quint 2018. L’entira summa vala uschia sco expensas novas suttamessas al referendum e duai vegnir avant il pievel grischun il 2022.

La varianta Pulvermühle vegn favurisada cunquai che al lieu existent po vegnir construì il pli favuraivel ed il pli spert pussaivel ha ditg cusseglier guvernativ Mario Cavigelli envers las medias. La Pulvermühle porscha er las opziuns giavischadas dad in'engrondiment eventual – quai cun reservas da terren. Il mument ha la HTW 1'450 students – planisà vegn cun 1'700. L'engrondiment quinta schizunt cun 2'000 students.

Schliar collavuraziun cun scola auta da Buchs

Il chantun Grischun ed uschia la HTW vulan schliar la collavuraziun cun l'associaziun per las scolas autas da la Svizra Orientala. Il motiv è la restructuraziun da l'associaziun. Uschia propona la regenza da schliar la cunvegna da l'onn 1967. Il Cussegl grond vegn probabel a tractar la fatschenta en la sessiun d’october.

RR novitads 12:00