Els veglian optimar lur project, che prevesa in hotel e chasas da vacanzas cun total passa 500 letgs. Quai han las Pendicularas Claustra-Madrisa che fan il project, ditg sin dumonda a las gasettas da Somedia. Tut duai uss succeder in onn pli tard,uschia ch'il resort da vacanzas vegniss avert sin l'enviern 2026/27.
Oriund era previs da cumenzar a bajegiar questa stad. Cunter il project «Ober Ganda» èn er anc 11 recurs pendents. La midada da project stettia en connex cun quels recurs, ha declerà il manader da project Roger Kunz sin dumonda da la Somedia. Pervi da quellas midadas vegnian er anc ina giada profilà.
Dimensiuns restian medemas
Las midadas pertutgan la chasa da parcar planisada tar la pendiculara Madrisa sco er il resort da giasts. Uschia vegnia optimà il percurs da la chasa da parcar e la fermada dal bus vegnia fatga confurma per persunas cun impediments. Tar il resort dettia optimaziuns tar la zona da wellness. La cubicatura dal project na sa midia dentant betg.
Er vi dal dumber da 430 parcadis na sa midia betg bler. Er il vitget duai vinavant consister dal hotel da 3 stailas e set chasas da vacanzas turisticas cun radund 550 letgs.
Start primavaira 2022
Vi dal decurs na sa midia er nagut, dentant vegnia il start per bajegiar spustà sin proxim onn, la primavaira. Sco emprim vegn construida da la chasa da parcar ed a partir dal 2024 lura il resort. Vegnir en funcziun duai il resort ils 2026/27.
Anc avert è sche la Dretgira administrativa dal Grischun lascha valair ina decisiun dal cussegl communal en connex cun il resort. Quel aveva declerà sco nunvalaivla in'iniziativa dal pievel encunter il project.
