Siglir tar il cuntegn

Header

video
Prinzipi dal Game&Watch, declerà da Ursin Lutz
Or da RTR dals 23.09.2016.
laschar ir. Durada: 57 Secundas.
cuntegn

Ulteriur Grischun «Retro-Games»: La passiun dad Ursin Lutz

El ha studegià rumantsch a Friburg ed ha era scrit ina dissertaziun. E sperasvi ramassa e martgadescha el cun gieus da video vegls. Ses biro en chasa è bain emplenì cun gieus dals onns 80. Per la bursa da gieus da video vegls a Berna è’l dimena bain preparà.

Ursin Lutz na ramassa betg dapi lung temp gieus da video, malgrà ch'el ha giugà sco uffant cun quels. Cun ramassar ha el pir cumenzà, suenter avair chattà ses vegl gieus en sia chombra d’uffants. Igl è surtut la nostalgia ch’el ha cumenzà a ramassar models da la seria da gieus Game&Watch. Suenter dus onns aveva el gia ensemen tut ils 60 models differents – però per el betg ina raschun per smetter a ramassar.

audio
Bursa da retro-games a Berna (so, 24-09): Ursin Lutz è fan e martgadant
ord Actualitad dals 23.09.2016.
laschar ir. Durada: 2 minutas 44 Secundas.

El na ramassà betg mo ils gieus, el tils reparescha er e tils revenda danovamain. I dess però restar in hobi, el n’è betg interessà vi dal grond profit.

Tge è insoma in Game&Watch?

La seria da gieus da video Game&Watch è vegnida producida dal producent da gieus giapunais Nintendo ils onns 1980 fin 1990. En tut datti 60 differents models, mintgin cun in agen gieu, che na po betg vegnir midà ora. Ils models han circa la grondezza dad in pitschen cudesch da notizias. In pèr models as pon vegnir avert per avair in monitur dapli. Il gieu vegn controllà cun divers buttuns. La crusch per controllar il gieu, tgi as chatta ozendi sin mintga controller, è vegnida sviluppada per il Game&Watch. Ozendi pon esser ils custs per in model (en bun stadi) sur 400 francs.

Diversas figuras renumnadas sco «Super Mario», «Link» or da «Legend of Zelda» o «Donkey Kong» han in gieu sin in dals Game&Watch.

La «Retrobörse»

Sonda ils 24.09. va Ursin Lutz ad ina bursa aposta per gieus vegls. Quella ha lieu a Berna ed as numna «Retrobörse». Ursin Lutz era gia dus giadas a quella fiera. Ad el plascha da martgadar e da discutar cun auters fans da gieus vegls. Ils blers da quels han er giugà en lur uffanza cun quests gieus.

Quest onn ha Ursin Lutz er ina finamira: Perquai ch'el ha fitg blers gieus da video en ses deposit, less el era vender blers. Enturn 50 tocs fissan ideal. Quant che el tira en cun quai, nun importa ad el.

Però el s’allegra gia uss, da chattar ina giada puspè ruaus cun giugar in gieu da video.

Artitgels legids il pli savens