Cunzunt dus puncts han dà da discutar en connex cun la nova lescha da polizia da la citad da Cuira. Tranter auter duai da nov esser pussaivel d'installar a Cuira cameras ch'identifitgeschan persunas. Er duai – sch'i va tenor il parlament da Cuira – vegnir abolì il scumond da baiver alcohol suenter las 00:30 uras en il public.
«Pli severa lescha da polizia» vegn schluccada
Uschia vul il parlament da Cuira schluccar la lescha ch'era enconuschenta sco «pli severa lescha da polizia da la Svizra». Il 2008 era vegnì decidì da scumandar da baiver alcohol en il public a Cuira. Quai per evitar canera, littering e caos en la citad. Tenor il president da la citad Urs Marti na saja quai betg pli necessari. En l'entir temp haja quai be dà paucas intervenziuns en quest connex. La fracziun da la PPS ha dentant vulì mantegnair quest scumond en la lescha, quel saja sa cumprovà ed haja levgià la lavur da la polizia, ha Mario Cortesi da la PPS argumentà. La dumonda da la PPS n'ha dentant gì nagina schanza en il parlament.
Identifitgar persunas cun cameras
Er pertutgant la surveglianza en il spazi public da la citad hai dà discussiuns. La nova lescha prevesa ch'installar cameras che pon identifitgar persunas duaja esser pussaivel. La fracziun socialdemocratica è sa mussada critica ed ha ditg ch'ina tala surveglianza cuntrafetschia als dretgs persunals. Dentant er quella midada n'ha betg gì schanzas.
La revisiun totala da la lescha da polizia vegn anc davant il suveran da Cuira. Quai suenter che la fracziun da la PPS n'ha betg acceptà la revisiun sco proponì da la suprastanza dal cussegl communal.
Nagina decisiun co vinavant cun il bogn Obere Au
En la segunda fatschenta ch’il Cussegl communal da Cuira ha tractà, n'hai dà nagina decisiun. Las propostas co e cu sanar ubain engrondir ils implants dal bogn Obere Au n’han betg persvadì il cussegl communal. Uschia ha quel returnà l’incumbensa a la suprastanza dal cussegl communal. Lezza sto uss surlavurar il messadi e suttametter in nov al parlament.