Il chantun na prolunghescha betg il mandat da la cumissaria da la regenza per la vischnanca da Roveredo e desista er da prender ulteriuras mesiras en chaussa. Quai ha communitgà la regenza suenter avair survegnì il rapport da la cumissaria Anna Giacometti. Lezza constatescha en ses rapport che la situaziun politica en la vischnanca da Roveredo saja bain sa calmada, dentant vinavant instabila e fragila. Ella haja l'impressiun che la vischnanca saja dividida. Mesiras immediatas na sajan dentant betg necessarias.
La regenza aveva nominà l'anteriura presidenta communala da Bregaglia Anna Giacometti sco cumissaria per Roveredo pervi da diversas dispitas entaifer la suprastanza ed en autras instituziuns da la vischnanca. Sco il cusseglier guvernativ Christian Rathgeb ha ditg envers RTR, haja Giacometti, cun sia gronda experientscha, pudì gidar a calmar la situaziun.
Mesiras communalas
Dapi la sentenzia da la Dretgira administrativa dals 4 da zercladur 2020 ha la suprastanza pudì prender conclus en sia cumposiziun ordinaria. La relaziun tranter la suprastanza e la cumissiun da gestiun è sa meglierada. La vischnanca ha pudì engaschar interimistic in chanzlist communal e spera da pudair occupar il proxim temp definitivamain questa posiziun centrala, quai che dastgass avair effects positivs sin l'activitad administrativa.
