12 persunas studegian il mument a la Scol'auta da teologia a Cuira per daventar plevon. Ils students èn da la Svizra, dentant er da la Germania, da l’India e da las Filippinas.
Ins chatta dentant era anc auters students ed autras studentas che vulan daventar assistents ed assistentas pastoralas, diacons u persunas cun funcziuns pastoralas, per exempel en scola, en ospitals u en l’economia. Radund 20% dals students èn dunnas.
Paucs students cumpareglià cun autras scolas
Il dumber da students saja pitschen, dentant relativamain stabila, di il rectur Christian Cebulj. A Friburg hai trais giadas dapli students da teologia, a Lucerna duas giadas. La situaziun geografica na saja nagin problem:
Lucerna e Friburg èn universitads cun pliras facultads. Nus essan individualists, cunquai che nus avain sulettamain la facultad da teologia.
La finamira saja da scolar persunas pastoralas per l’uvestgieu e per la regiun. Duas generaziuns da teologs e teologas ha la scol'auta da teologia scolà durant ils ultims 50 onns.
La crisa
Che la scola po insumma festivar ses 50avel anniversari è dentant bunamain ina miracla. Avant 18 onns, l'onn 2000, è la scola numnadamain bunamain vegnida serrada. Ils scolars ed uschia er ils daners mancavan. Durant ils onns 90 è il dumber da scolars crudà da bun 60 sin mo 16. Lura hai dentant dà in grond moviment tar las baselgias chantunalas e tar il uvestgieu, nua ch'ins ha mobilisà blera glieud. Sper quai hai dà ina nova fundaziun «amis da la Scol'auta da teologia Cuira» per salvar la scola. E quai è lura er gartegià. Be paucs onns suenter è il dumber da scolars puspè sa stabilisà.
La fundaziun
«Amis da la Scol'auta da teologia Cuira» è vegnida fundada durant il temp da crisa sco che Heidi Derungs-Brücker, la presidenta da la fundaziun, declera. L'uniun Grischunas e Grischuns per ina baselgia vardaivla aveva prendì l'iniziativa e clamà en vita la fundaziun. En ils 18 onns ch'i dat gia la fundaziun ha ella surdà a la scol'auta radund 1,7 milliuns francs. Quels daners vegnan tranter auter duvrads per bajegiar or la perscrutaziun, per in film dad image, ed actualmain vegnan daners da la fundaziun er duvrads per il giubileum da 50 onns.
RR actualitad 08:00