Salome Mathys ha 32 onns, è co-presidenta dals verd-liberals da Cuira e lavura tar l’Uffizi da migraziun dal chantun Grischun. Cun sia candidatura veglia la partida purtar in vent frestg en la suprastanza da Cuira - saja quai sco suletta dunna che candidescha per la suprastanza u sco politicra giuvna. La citad da Cuira elegia ils 5 da zercladur ina nova suprastanza ed in nov parlament.
Jau vuless gugent reactivar l'idea d'in lai a Cuira.
Salome Mathys è oriundamain Bernaisa e stat pir dapi bun in mez onn a Cuira. Quai possia esser d'in maun in dischavantatg, cunquai ch'ella n'enconuschia betg tut las atgnadads da la chapitala grischuna. Da l'auter maun dentant fetschia forsa era bain, sch'insatgi haja ina vista d'ordaifer. Sco Bernaisa manchia ad ella a Cuira surtut in lai, ha Salome Mathys tradì oz avant las medias. Perquai veglia ella tranter auter prender a mauns ina veglia idea: Realisar in lai a Cuira.
13 candidats per il parlament
La finamira dals verd-liberals èsi da mantegnair il sez da Jürg Kappeler en il parlament da Cuira e da gudagnar vitiers anc in mandat. Uschia avess la partida verd-liberala fermezza da fracziun. Sper Jürg Kappeler candideschan 12 persunas per il parlament.
RR novitads 11:00
