Siglir tar il cuntegn

Header

cuntegn

Ulteriur Grischun Sanaziun d'in toc istorgia da la citad

L’areal dal vegl lavuratori forestal da la citad da Cuira è contaminà. Per sanar el e preparar la parcella per in nov project han ins stuì rumper giu las ultimas perditgas da l’emprima fabrica da gas da la citad.

Stabiliments plain asbest, ieli da catram en il terren che cuntegn PAK, ina substanza che po chaschunar cancer. L’areal dal vegl lavuratori forestal che vegn gia dapi divers onns betg pli duvrà è gia dapi in temp sin la glista da sanaziun da la citad. Avant dus onns ha la citad pervi da quai concedì in credit da 1.5 milliuns francs per allontanar ils stabiliments e sanar il funs contaminà. Uss vegn quest plan realisà.

Emprima fabrica da gas

Il motiv per la contaminaziun va enavos 150 onns. Il 1859 era vegnì fabritgà là l’emprima fabrica da gas da la citad. Sco 10avla citad en Svizra ha Cuira introducì l’illuminaziun da gas sin las vias ed en tschertas chasadas. Da quai temp in pass revoluziunar. Fatg il gas han ins cun laina e charvun. In product che restava era l'ieli da catram.

50 onns è vegnì producì gas en quest lieu fin che la citad ha stuì construir ina pli nova e pli gronda fabrica. Il funs contaminà ed ils vegls stabiliments èn restads – e quai fin ussa.

video
In areal amez Cuira è contaminà – las lavurs da sanaziun
Or da Telesguard dals 19.10.2018.
laschar ir. Durada: 2 minutas 47 Secundas.

In toc istorgia va a perder

Malgrà ch'in toc istorgia da la citad svanescha èsi per il president da la citad Urs Marti normal, che perditgas da temp ston mintgatant far plaz ad insatge nov. Fin la fin da l’onn è l’areal deliberà dals tissis en il funs e liber per in nov chapitel en l’istorgia da la citad. La firma d'IT Inventx ha gia dapi in temp plans da construir in nov sez principal en quest lieu. Pervi dad in recurs d’in vischin è quai il mument dentant anc avant dretgira administrativa.

TR Telesguard 17:45

Artitgels legids il pli savens