Ils hits da schlagher – els èn onn per onn ils medems. Betg mancar dastga er il president da la citad, Urs Marti ch'è stà quest onn en gir cun vespa. Il til n'è betg pli ì tras la citad veglia, mabain tras la Grabenstrasse vers la halla da la citad. Quai n'ha betg plaschì a tuts dals radund 32'000 aspectaturs. La parada tras la citad veglia haja plaschì meglier.
Il til è stà cool, ma igl ha gì bleras largias ed ins n' ha betg udì musica l'entir temp. Fin uss na sun jau anc betg persvadida da questa novaziun.
Dentant datti er da quels ch'èn dal tuttafatg satisfatgs cun la nova ruta. Per els è l'atmosfera sco tala pli impurtanta che la ruta.
Per mai esì gist tuttina bel – independent sch'ils mobils van d'ina u da l'autra vart».
Halla da la citad empè da l'Arcas
La midada la pli radicala pertutga ils puncts da program suenter la parada. Tals n' han betg pli gì lieu en il center da la citad. La festa ha gì lieu avant la halla da la citad nua ch'i ha dà divers concerts. Chantà han Guildo Horn ch'è turnà suenter diesch onns puspè a Cuira ed era la band Dschinghis Khan. Intgins visitaders n'ha la dischlocaziun da la festa davent da la citad veglia dentant betg persvadì.
Els chattan donn ch'i marschia nagut pli en la citad veglia, declera ina dunna cun frisura toupada à la Audrey Hepburn. Dal medem avis è er in um sper ella cun egliers da sulegl e «schlaghosas».
Nus na persvada quai betg. Nus restain en la citad veglia – qua plascha a nus.
I saja schon da sa disar vi da quai, ma els giajan uss tuttina anc en la citad a guardar, sche la festa per ils pli vegls semesters saja là e quella tar la halla saja per ils giuvens, uschia in auter votum.
1'500 persunas a la disco da rullettas
Entschet ha la festa gia il venderdi saira cun ina disco da rullettas. Var 1'500 persunas hajan ins dumbrà tar questa occurenza, ha declerà Esra Buchli, president dal comité d'organisaziun, envers RTR. Quest concept haja er potenzial per l'onn che vegn. Il mument na possia el però anc betg dir definitiv ch'ins vegnia a mantegnair las midadas.
Jau crai che a lunga vista è quai stà la dretga decisiun da purtar ina tala midada radicala en quest event.
Consum d' alcohol è nagin problem
Dals hossa-mobils vegn betg be repartì zutgerins e fluras, ma er in'entira massa gervosa. Ina participanta va enturn cun la buttiglia vin ed emplaina magiels da plastic ch'èn vids. Adina puspè stgarpitschan ins sur stgatlas da gervosa vidas. Nua ch'ins guarda hai spirituosas.
Quai saja dentant nagin problem, declera Esra Buchli. Sa chapescha dettia intgins che baivian in zic dapli che uschiglio. Quai saja savens glieud che sa legra l'entir onn sin quest event.
Cler - jau na vuless er betg organisar in event ch'è simplamain ina barracada. Ma jau chat ch' ins duai viver e laschar viver.
RR actualitad 07:00