Siglir tar il cuntegn

Header

cuntegn

Ulteriur Grischun Schluccar la «pli severa lescha da polizia en Svizra»

Cuira ristga da perder sia reputaziun dubiusa sco citad svizra cun la pli severa lescha da polizia. En la chapitala grischuna duai quai numnadamain en l’avegnir puspè esser lubì da consumar alcohol suenter mesanotg sin terren publica.

A Cuira duai quai en l'avegnir puspè esser lubì da consumar alcohol suenter mesanotg sin terren public.

In zic dapli libertad per la giuventetgna

Cun stritgar l'artitgel correspundent en la lescha da polizia duaja puspè vegnir dar in zic dapli libertad a la giuventetgna. Quai scriva il cussegl da la citad da Cuira en ses messadi ch'el ha approvà per mauns dal parlament. L'intervenziun da stritgar l'artitgel era vegnida da la Partida burgais-democratica.

Il scumond vala dapi il 2008 e mintgamai tranter las 00:30 e las 07:00. El aveva procurà per la reputaziun che Cuira haja la pli severa lescha da polizia en Svizra. Bain datti en Svizra ulteriuras vischnancas cun in scumond nocturn d’alcohol en la publicitad. Ma quests scumonds pertutgan be giuvenils.

15 multas per onn

La polizia da Cuira è tenor indicaziuns da la regenza da la citad sa retegnida cun reparter multas ed uschia far diever da l’artitgel d’alcohol. 15 multas disciplinaras a 50 francs èn vegnidas repartidas mintg’onn.

Sco la regenza da la citad da Cuira scriva, vesev’ins il scumond al l’entschatta sco med effizient cunter in surconsum d’alcohol dals giuvenils. Oz saja dentant be ina pitschna part da las tgirallas da notg giuvenils fin 18 onns; u ch’ins n’entaupia betg els suenter mesanotg.

Zonas libras da drogas duain restar

Nagin consentiment ha però chattà ina petiziun dal parlament da giuventetgna da la citad da Cuira. La petiziun pretenda da stritgar l’artitgel davart las zonas libras da tissis enivrants ord la lescha da polizia, e quai senza cumpensaziun.

La regenza na vul savair nagut da quai, i na stoppia betg vegnir agì. L’artitgel scumonda mintga consum d’alcohol, nicotin u d’autras drogas sin areals da scolas u scolinas sco era sin plazzas da gieu.

RR novitads 15:00

Artitgels legids il pli savens