Siglir tar il cuntegn

Header

cuntegn

Scola chantunala da Cuira Uffizi prenda sut la marella festa da matura

L’uffizi per furmaziun media-superiura veglia prender sut la marella la festa da maturitad da venderdi passà. Intginas persunas n’hajan betg resguardà las prescripziuns.

Il venderdi avantmezdi ha gì lieu ina festa da maturitad a la scola chantunala a Cuira. Durant quella han tranter 200 e 300 maturandas e maturands ballà en ina sala. Tenor differents portals online haja la direcziun permiss il sautar – quai per var in'ura. Durant tut l'occurrenza duai dentant valair il concept da segirtad. L'occurrenza na saja betg stada publica.

Differentas persunas n'hajan dentant betg sa tegnì vid quel concept. Quai mussa in video, ch'il portal online «20 Minuten» ha survegnì.

Uffizi vul scleriment

Sco che la chanzlia chantunala scriva, saja l'Uffizi chantunal per scolaziun superiura vegnì infurmà davart il cas. L'uffizi veglia, ensemen cun las autoritads cumpetentas, sclerir tge ch'è schabegià e co ch'ins possia en futur evitar tals incidents.

Tenor ina communicaziun da la chanzlia, deplorescha la Scola chantunala, l'Uffizi per la furmaziun media-superiura ed il Departament d’educaziun, ch'intginas persunas n'èn betg sa tegnidas vid las prescripziuns. Els menziuneschan dentant, che la scola chantunala sa participescha regularmain als tests da massa chantunals.

Il directur da la scola auta n'è betg stà cuntanschibel durant la sonda. Fin ch'ins ha sclerì il cas na veglian ins dentant betg infurmar dapli, infurmescha la chanzlia chantunala.

audio
Per tadlar curt e cumpact
ord RTR Audio dals 18.04.2021. Maletg: RTR
laschar ir. Durada: 57 Secundas.

RTR novitads 17:00

Artitgels legids il pli savens