La fundaziun «Hans Huber» ha onurà l’interpresa internaziunala Ems-Chemie cun il premi naziunal da furmaziun. A chaschun d'ina gronda festa ha la scheffa da l'Ems Chemie prendì encunter la distincziun. Tar ina gronda festa ha la scheffa da l'Ems Chemie, Magdalena Martullo, prendi encunter il premi. Era autras fatschas enconuschentas èn stadas preschentas tar la surdada. Sco per exempel l’anteriur cusseglier federal Christoph Blocher, il cusseglier guvernativ Jon Domenic Parolini u il rectur da la scol’auta grischuna Jürg Kessler.
In premi per fatschentas enconuschentas
Christoph Firchter, il president da la fundaziun «Hans Huber» declera che l'Ems-Chemie haja ademplì ina gronda part dals criteris per il premi naziunal da furmaziun. Quels criteris sajan tranter auter che l'interpresa scoleschia pliras clamadas e ch'ins haja la pussaivladad da sa sviluppar entaifer l'interpresa era suenter l'emprendissadi. Magdalena Martullo ha plaschair dal premi e suonda uschia vinavant a sia definiziun d’in bun emprendissadi:
In bun emprendissadi munta ina buna scolaziun per far suenter ina buna lavur.
Cunquai ch’i sa tracta d’in premi naziunal vegn il premi tratg si medial. Per ordinari vegn uschia elegì ina fatschenta ch’ins enconuscha en tut la Svizra. En ils davos onns ha sper l’Ems-Chemie era l’AMAG u Stadler-Rail gudagnà il premi. Pia, fatschentas cun bleras resursas.
RTR actualitad 12:00
