Siglir tar il cuntegn
Inhalt

Ulteriur Grischun Sensaziun paleontologica da vesair a Cuira

Avant intgins onns aveva il paleontolog da hobi Christian Obrist chattà il fossil d'in pesch. In pesch sco anc mai vesì: El tutga tar ina nova razza da peschs-barlocca (Quastenflosser) ed è 240 milliuns onns vegl. Da quel pesch derivan ils emprims animals ch'han insumma bandunà l'aua.

Il fossil chattà è 20 centimeters lung. Il chau è pli grond ed il corp è pli curt che tar las sorts enconuschentas. Foreyia maxkuhni è il num da la razza nova chattada en Grischun tar la Ducanfurgga a Tavau sin 2'740 meters sur mar.

Las stresas da chaltschina sin la Ducanfurgga tranter Tavau e Bravugn èn in paradis per paleontologs. Dapi radund 30 onns chattan ils scienziads là fossils da dinosauriers, plantas e peschs.

Il paleontolog da hobi Christian Obrist ha s'occupà dal fossil

La platta da crap cun en ils fastiz è vegnida transportada cun l'helicopter davent da Tavau. En lavur da detagl ha lura Christian Obrist preparà il fossil. En differents pass ha el pulì e «fatg bella» sia scuverta.

Lionel Cavin, expert per peschs fossils en il museum d'istorgia natirala da Genevra, ha lura congualà il pesch grischun cun auters fossils.

Betg be x in pesch-barlocca, ma ina razza nova

La diagnosa da l'expert: Il pesch chattà avant trais onns en Grischun tutga tar razza da pesch-barlocca. Tenor Heinz Furrer, l'anteriur curatur da l'institut paleontologic da l'Universitad da Turitg, è la nova razza surtut interessanta per l'istorgia da l'evoluziun.

Als 20 d'october era il pesch vegnì preschentà a Genevra per l'emprima giada a la publicitad. Il fossil è pel mument mess ora en il Museum da la Natira a Cuira, ensemen cun auters fossils chattads en Grischun.

RR actualitad 17:10

Ils peschs-barlocca

Il fossil dal Ducan.
Legenda: Keystone

Tar il pesch chattà na sa tractia quai betg mo dad ina spezia nova, ma schizunt dad in gener nov da peschs-barlocca. Ditg aveva la scienza pensà, ch’ils peschs sajan morts ora en il temp dals dinosaurs. En il 20avel tschientaner han scienziads dentant puspè chattà peschs-barlocca.