Siglir tar il cuntegn

Header

Navigaziun

Legenda: Guardar il video Sepultura dad Amédée Grab. Durada 01:41 minutas.
Or da Telesguard dals 27.05.2019.
cuntegn

Ulteriur Grischun Sepultura da l’anteriur uvestg da Cuira Amédée Grab

En il santeri da la catedrala da Cuira è glindesdi vegnì sutterrà l’anteriur uvestg da l’uvestgieu da Cuira Amédée Grab. La messa da bara ha l’administratur apostolic da la diocesa da Cuira Peter Bürcher fatg.

A la sepultura èn era represchentants da la politica stads, tranter auters ils cussegliers guvernativs Marcus Caduff e Jon Domenic Parolini ed il president da la citad da Cuira Urs Marti.

Ils 19 da matg era Grab mort en la vegliadetgna da 89 onns a Roveredo en il Mesauc, nua ch’el era sa retratg. Il 2007 aveva el demissiunà sco uvestg da la diocesa da Cuira or da raschun da vegliadetgna.

Grab aveva surprendì l’uffizi d’uvestg l’avust 1998. Avant aveva el manà la diocesa da Losanna, Genevra e Friburg.

Ierta difficila

Amédée Grab era suandà Wolfgang Haas en l’uffizi d’uvestg. Haas ch’era dispitaivel era stà 10 onns uvestg da Cuira ed è vegnì nominà dal Papa sco archuvestg da Vaduz en il Principadi da Liechtenstein. Grab aveva pia surprendì in uffizi difficil e vuleva esser cunzunt spiritual – quai che è era reussì ad el pertge sut sia direcziun era la situaziun en la diocesa sa calmada.

TR Telesguard 17:40