Siglir tar il cuntegn
Inhalt

Ulteriur Grischun Sin il campadi sch'i è trid'aura

Sin il campadi tranter il bogn avert Obere Au ed il Rain a Cuira èsi quiet. Mo in pèr giasts èn da vesair sin la plazza. Sch'i è trid restan ils blers en lur rulottas ni tendas ni èn sin viadi.

Il campadi Camp Au a Cuira n'è betg in tipic campadi da vacanzas. Era sch'i dà giasts da vacanzas pernotteschan blers mo ina u duas notgs là sin lur viadi vers il sid ni il nord. Intgins dentant vivan sur onn sin il campadi.

Hermann Caminada e sia dunna vivan gugent sin il campadi

Hermann Caminada e sia dunna chinaisa sesan en lur rulotta pachetada en ina chasina melna. I è bain stretg, mo drizzà en cun premura. L'um pensiunà, oriund da Vrin, e sia dunna vivan dapi trais onns sin il campadi a Cuira. Perquai che sia dunna saja ina da la citad ed el dovri ina terrassa. E perquai ch'els viagian regularmain en la China. I saja simplamain pratic uschia.

Sch'i plova ed è trid lura saja quai schon stretg en la rulotta, conceda Caminada. Mo el saja ì ad alp sco uffant e saja perquai disà da viver sin in spazi pitschen. Ed il medem vali per sia dunna che dat il chau.

Ina gronda famiglia

Ils fittadins fix sajan sco ina gronda famiglia, di Hermann Caminada. Ins sa gida ed i vegni er fatg regularmain festas ensemen. Quai aud'ins era en l'ustaria, nua che Cloti Caviezel lavura. Integrà en l'ustaria è ina pitschna butia ed il retschaviment dal campadi.

Sin il campadi Camp Au a Cuira datti bundant 40 plazzas cun rulottas fixas e tranter 40 e 60 plazzas per giasts da vacanzas.

RR actualitad 17:00