Il president da la citad da Cuira, Urs Marti, vesa grond potenzial en la branscha d'informatica e tecnologia da communicaziun. Per il mument datti a Cuira var 1'000 plazzas da lavur sin quest sectur. Ch'ins vul schlargiar uss quest sectur, haja er da far cun il fatg, che la citad haja be pauca plazza per industria. Vinavant dettia quai er impuls per ir en direcziun «Smart City» – pia ina citad che nizzegia blera tecnologia.
Per rinforzar la branscha, na vul la citad dentant betg simplamain investir raps. Urs Marti vul surtut dar incumbensas. Surtut glieud giuvna, cun sustegn da la scol'auta, duessan avair l'occasiun da sviluppar per exempel novs products per la citad. En tge rom che quai duess esser, n'è dentant betg cler.
«ICT Cluster»
In punct essenzial per promover l'inovaziun sajan uschenumnads «ICT Clusters». Tenor John Fisher, CEO da la firma Würth Itensis, sajan quai ina sort organisaziun lucca. Sur quella possian differentas organisaziuns barattar or ideas e concepts. Els hajan quai gia nizzegià cun success. Uschia hajan els sviluppà products per la branscha da construcziun u hajan collavurà cun ina firma da sistems da communicaziun.
La citad da Cuira construescha ensemen cun il chantun in tal cluster. Uschia spera la citad da survegnir dapli glieud e firmas innovativas, e la fin finala era dapli plazzas da lavur.