«Smart», ma anc betg in «Shuttle»

A Maiavilla han ins testà in auto da posta senza manischunz ils ultims dis. Ma spert hai dat l'emprim cuntraculp. Surtut pervi da l'aura na saja betg pussibel da testar enavant l'auto da posta autonom.

Il «SmartShuttle» a Maiavilla. Bild in Lightbox öffnen.

Legenda da maletgs: Be sco demonstraziun: Atgnamain duess il «SmartShuttle» ir da la staziun al vitg da Heidi. Per til mussar a la glieud tura el dador Maiavilla. RTR / Flurin Clalüna

«Il prim pass saja il pli heicli», uschia il suppleant manader dad Auto da Posta Grischun Riet Denoth. Per programmar en il traject ch'el dess ir pli tard, dovri cundiziuns optimalas. Dimena nagina naiv, nagin glatsch e nagina plievgia. Quai n'è betg stà il cas ils ultims dis. Uschia na pudevan els betg programmar la via dal bus e cun quai era betg ir sin il traject planisà.

Schon en discussiun en il vitg

Per pudair tuttina preschentar il bus a la glieud, ha l'auto da posta autonom tratg turas sin in simpel traject dador Maiavilla. Uschè ha la glieud tuttina pudì vegnir a mirar, tge che spetga els. Surtut ils uffants dal vitg èn stads intgantads e fascinads dal nov vehichel. Ma era ils creschids han parids d'avair plaschair vi dal «SmartShuttle», bain ch'in u l'auter n'ha betg ristgà da charrar cun in auto da posta senza manischunz.

Il «Smartshuttle» a Maiavilla. Avrir maletg en lightbox.

Legenda da maletgs: Il spert gudagna: Surtut ils scolars pli giuvens vulan esser ils emprims en l'auto da posta futuristic. RTR/ Flurin Clalüna

I resta be da spetgar

Per far enavant cun ils tests sa ston els spetgar sin bun'aura senza naiv. Probablamain vegn quai ad esser pir la primavaira. Là vulan els cuntinuar culs tests. Pli tard en stad 2018 vulan els lura porscher ils emprims viadis.

RR actualitad 07:00