Siglir tar il cuntegn

Header

cuntegn

Ulteriur Grischun St. Antönien: Glisch verda per ovra solara

La radunanza communala ha approvà ina revisiun parziala da la lescha da construcziun ed uschia dà glisch verda per ina nova ovra solara sur St. Antönien. Ultra da quai sa participescha la vischnanca ad in'ovra idraulica.

La radunanza communala da Luzein ha approvà il venderdi saira ina revisiun parziala da la lescha da construcziun. Cun quai pass ha ella dà glisch verda per ina ovra solara sur St. Antönien. Las ovras electricas dal chantun Turitg EWZ pon uschia installar panels solars tranter ils rempars da lavinas. L’emprim project vuleva anc installar ils panels directamain vid ils rempars. Quai era vegnì refusà avant dus onns. L'implant al Chüenihorn duai producir fin 3 uras gigavatt electricitad ad onn. Quai corespunda al consum da passa 650 chasadas.

Participaziun a l'ovra idraulica Schanielabach

Plinavant sa participescha la vischnanca da Luzein cun 1 milliun francs a l’ovra idraulica Schanielabach. La radunanza communala ha approvà cun 73 : 0 vuschs unanimamain il credit correspundent – mintgamai 500’000.- francs per segnar aczias e per in emprest. Suenter il terz onn da gestiun quinta la vischnanca cun ina rendita monetara da 140’000.- francs per onn ord quest project.

Ultra da quai ha la radunanza da Luzein discutà ina dumonda da reducir las taxas da cura. En la votaziun consultativa a ina vusch fatg la differenza per in'adattaziun da las taxas da cura.

RR novitads 12.00

Artitgels legids il pli savens