Siglir tar il cuntegn

Header

audio
Quartier da mastergnants medieval scruvrì al Sennhof
Or da Actualitad dals 21.07.2020.
laschar ir. Durada: 3 minutas 20 Secundas.
cuntegn

Stgazi al Sennhof Chattà quartier da mastergnants tar exchavaziuns

Dapi il mars 2020 è il servetsch archeologic dal Grischun vid exchavaziuns tar l'anteriura praschun Sennhof en la citad veglia da Cuira. Tar las exchavaziuns han els chattà in quartier da mastergnants dal temp medieval.

Tenor la communicaziun dal chantun, sajan il dumber ed il tip dals objects spezialmain remartgabels. In object saja extraordinari per l'entira Svizra. I sa tracta d'ina pitschna platta da crap, ch'ins duvrava per cular en seria bischutaria u objects religius. Talas furmas da cular chattan archeologs fitg darar. En Svizra han ins be chattà da quels a Berna, Basilea e Winterthur. Quai che fa quella a Cuira anc pli speziala è ch'i sa tracta da la pli veglia ch'è vegnida chattada en Svizra. Ella è numnadamain datada sin il 9avel – 11avel tschientaner.

Purtret d'ina platta da crap.
Legenda: La platta da crap che vegniva duvrada per cular bischutaria. Quella han ins duvrà per producir en seria. Servetsch archeologic dal Grischun

Quartier da mastergnants

Il mument saja il servetsch archeologic vid examinar ina surfatscha en il sidost da la zona da bajegiar. Là hajan ins chattà structuras en furma da pitgas e foss. Fitg remartgabel saja il grond dumber d'objects ch'ins haja chattà. Ina gronda part sajan numnadamain ossa d'animals, il pli savens da chavals, fabricats anc betg finids u las restanzas da products. Quai ed er auters chats laschian supponer ch'i sa tracta d'in quartier da mastergnants dal temp medieval tempriv ed autmedieval.

Nova vista sin il plan da la citad

Il quartier da mastergn saja ina scuverta extraordinaria declera il manader da l’exchavaziun al lieu Bernd Heinzle. Quai mussia numnadamain ch’i haja era dà lieus da producziun ordvart ils cunfins da la citad da Cuira. Sin plans da la citad da Cuira saja quai indriz mai vegnì menziunà. Perquai ch’i dat durant il temp medieval paucas regurdientschas a scrit sajan ins fitg dependents da l’archeologia. Ussa hajan ins savì crear in’auter maletg da la citad durant quest temp.

Exposiziun per il 2023

Ils chats extraordinaris duain vegnir examinads durant ils proxims mais. Plinavant duai dar ina preschentaziun publica dals chats en il rom da l'exposiziun planisada per il tema «Commerzi e mastergn tranter il Lai da Constanza ed il Rain alpin». Quella è planisada per la stad 2023 en il Museum retic a Cuira.

RTR novitads 10:00

Artitgels legids il pli savens