«Ina grondiusa clamada e funcziun, ina gronda satisfacziun e jau crai er in bun success». Cun quests chavazzins resumescha l'um da Falera ils 15 onns sco rectur da la scola chantunala. Il temp tar il pli grond gimnasi dal Grischun haja plaschì fitg bain ad el ed el bandunia il gimnasi cun in bun sentiment.
Ils davos 15 onns è la scola chantunala dentant sa midada fermamain. Dad ina vart èn grondas parts dals bajetgs vegnids sanads. Vinavant ha la scola stuì sa fatschentar cun la digitalisaziun. Sur 500 computers e 100 emetturs da WLAN datti il mument sin il campus. Dentant er novas leschas e la tschertga da persunal sajan stadas sfidas.
La pli gronda sfida è stà, da dumagnar tut sut in tetg.
Tut na saja dentant er betg gartegià. Cun l'experientscha ch'el haja uss, dessia el dapli temp per intgins process ed intginas midadas. La scola saja in manaschi relativ plaun, la magistraglia haja in med da lavurar, che na sa laschia betg midar d'in di sin l'auter. Qua avessia mintgatant duvrà dapli pazienza.
Finiziun cun corona
L'ultim onn da scola saja anc ina giada stà ina sfida speziala. Sin in virus cun uschè ina grond'influenza na saja nagin stà preparà. Tuttina sa mussa Gion Lechmann cuntent:
Da principi avain nus survivì e surmuntà quel temp bain.
Intgins quitads sajan dentant restads. In punct: Quant da quai che las scolaras e scolars emprendan resta ad ellas ed els? Quai saja in punct ch'ins stoppia proxim onn dar in sguard. Vinavant hajan els analisà adina puspè, co ch'il emprender sin distanza funcziuna e co ch'ils scolars vegnian a frida cun quai.
«Quels chattan segir la dretga via»
Philippe Benguerel succeda a Gion Lechmann. El daventa a partir dal 1. d'avust da quest onn nov rectur da la Scola chantunala. Gion Lechmann, lura manader da l'Uffizi chantunal per la furmaziun media-superiura, vegn ad esser il schef da Benguerel. El vegn pia vinavant a restar en contact cun la «Kanti». Memia blers cussegls na vuless Gion Lechmann dentant betg dar a ses successur. Intgins cussegls generals ch'el dat tuttina: avair bugen la scola e crair vi dad ella. Davart il successur manegia el dentant: «Quels chattan segir la dretga via».
Ord l'archiv
Il 2005 ha Gion Lechmann surprendì la direcziun da la scola chantunala. Curt avant han ils «Cuntrasts» tematisà la dissertaziun da Gion Lechmann.
