Gia enfin uss haja la cumissiun Maiensäss, ils uffizis da la citad responsabels sco er in cussegliader per privels da natira, examinà la segirezza da quell'occurrenza. Uss duai dentant ina gruppa d'experts externs examinar las cundiziuns da segirezza da quell'occurrenza. Ils experts duain examinar mintga pass, da la planisaziun, sche avunda persunas da surveglianza èn enturn fin a las infurmaziuns ch'ils scolars survegnan. Uschia vul il cussegl da la citad sclerir, sch'i dat puncts ch'els han enfin uss betg resguardà bain avunda.
Tut tenor a tge conclusiuns che la gruppa d'experts vegnia, resalvia il cussegl da la citad da prender «mesiras extendidas». Tge che gliez muntass precis, n'ha il cussegl da citad betg explitgà. Il rapport dals experts duai esser avant maun l'atun.
«Sbagl da communicaziun»
Vitiers curregia il cussegl er sia decleraziun ch'ils geniturs dal giuven na sajan betg stads cuntanschibels. I saja stà ina malchapientscha tranter la citad e la Polizia chantunala, communitgescha il cussegl da la citad. Atgnamain n’aveva la Polizia chantunala anc betg empruvà da contactar ils geniturs. Els hajan anc stuì identifitgar senza dubis l’identitad dal giuven disgrazià. Quai haja durà fin suenter las 20:00. Fin enturn las 20:30 n'hajan ils geniturs betg savì che lur figl è disgrazià. Pir cura ch'els hajan telefonà a la magistra ha la Polizia chantunala infurmà els.
Ils 23 da matg è il giuven da 14 onns sa disgrazià sin il viadi enavos a Cuira. El è crudà d'ina spunda taissa giuador. Dapli n'è per il mument betg enconuschent. La polizia chantunala investighescha anc.
RR actualitad 17:00