Siglir tar il cuntegn

Header

video
VR sto redimensiunar plans per Domat
Or da Telesguard dals 26.11.2018.
laschar ir. Durada: 2 minutas 48 Secundas.
cuntegn

Ulteriur Grischun Suenter il NA – VR sto redimensiunar plans per Domat

Perquai ch'ils da Domat han refusà il project per in sutpassadi sto la Viafier retica VR redimenisunar ses plans per renovar la staziun. Concret: Ils trens da la lingia d'Alvra na pon en l'avegnir betg pli fermar a Domat.

Tar la renovaziun da la staziun vulevan ils responsabels da la Viafier retica VR prolungar ils perruns per pudair fermar er cun pli lungs trens – ensasez.

Senza sutpassadi n'è quai tenor il responsabel per l'infrastructura da la VR , Christian Florin, betg pussaivel. Las duas barrieras da mintga maun limiteschian els en quels plans.

Ils trens vegnan pli lungs e na pon perquai betg pli fermar

Actualmain n'ha tut quai anc naginas consequenzas – perquai che tut ils trens èn cun enturn 200 meters lunghezza anc entaifer la lunghezza da la staziun. En l'avegnir vegnian ils trens da la lingia d'Alvra, che vegnan e van en l'Engiadina, però ad esser pli lungs – numnadamain 310 meters lungs.

Quels na possian lura tenor il responsabel per l'infrastructura betg pli fermar a Domat.

Garantir l'urari da mes'ura

Tge effect che tut quai ha per l'urari dals trens tras Domat n'ha Christian Florin anc betg savì dir exactamain. L'urari da mes'ura veglia la VR però garantir en mintga cas a lunga vista. Quant dapli ch'i saja pussaivel na possian ins anc betg dir per il mument:

La dumonda è simplamain co ch'il tren da l'Alvra, quel da la Surselva ed ils trens rapids san vegnir coordinads ils ins cun ils auters.
Autur: Christian Florin responsabel per l'infrastructura tar la Viafier retica
audio
Saira: Co vinavant suenter il NA da Domat?
ord Actualitad dals 26.11.2018.
laschar ir. Durada: 1 minuta 41 Secundas.

Cumenzar a bajegiar fin 2019, entschatta 2020

Il project per renovar la staziun da Domat saja però uschenavant pront. Uss saja be d'adattar el a la nova situaziun senza sutpassadi. Sin la primavaira 2019 vul Christian Florin da la VR inoltrar il project tar l'Uffizi federal per traffic e sin la fin 2019 / entschatta 2020 cumenzar cun las lavurs da construcziun.

RR actualitad 17:00

Artitgels legids il pli savens