Diesch onns en il parlament, otg onns en la regenza: Tom Leibundgut da la Glista libra terminescha sia carriera politica a Cuira. L'um da 58 onns n'ha betg pli candidà quest onn per ina nova perioda d'uffizi. Per il mument rumescha el si ses biro, per far plaz a sia successura, Sandra Maissen.
Cun rumir ses biro en la chasa da la citad, vegnian si differentas regurdanzas, di el en l'internvista cun il schurnal regiunal da radio SRF. El manegia dentant, che la melanconia na saja betg gronda.
Cuira è daventà pli viv
Il 2012 ha Tom Leibundgut candidà per la regenza. Quai tranter auter cun la finamira da far or da Cuira in lieu pli bel e pli viv. Quai saja tenor el gartegià bain. Per l'ina saja la zona da peduns da la staziun fin en la citad veglia gartegiada fitg bain. Vinavant dettia durant la stad dapli occurrenzas, sco per exempel la Schlagerparade.
Cuira è daventà pli urban, senza dentant perder ses character. Jau manegel schon, ch'ins ha cuntanschì qua insatge.
Grond plaschair fan a l'um cun egliers marcants surtut chaussas pli pitschnas. Qua in pèr bancs, là in pèr flurs – en general dapli colur en citad. Quai sajan, tenor Tom Leibundgut, piculezzas che fetschian plaschair a la glieud.
Dentant tut na saja er betg gartegià. La nova plazza da ballape cun novas tribunas na saja per exempel anc betg uschè enavant sco sperà. La halla d'ir a chaval saja vinavant «en ils pes» – a la regenza da Cuira na saja betg gartegià da chattar ina soluziun.
Co vinavant?
In proxim grond project na datti per il mument betg. Tom Leibundgut sa legra da pudair durmir ora, dad avair dapli temp per sia famiglia e per ses chauns. Vinavant veglia el ir a mirar l'Europa. Ed el sa legra da star si la damaun senza stuair prender responsabladad per insatge u senza stuair represchentar in gremi u ina decisiun.
Ch'el s'engascha en futur per in nov project, saja probabel, manegia l'um da 58 onns. Tgenin na saja dentant anc betg cler.
La vusch marcanta
Insatge marcant vi da Tom Leibundgut è sia vusch magari rauca. Co ch'el di en l'intervista saja quai ina consequenza da la vita da notg a Cuira. El haja lavurà en bars plain fim, nua ch'igl ha er gì aria currenta. Ed el haja er discurrì bler. Tut quai haja fatg donn a sia vusch. I saja pussibel dad operar e da reparar puspè sia vusch. Quai na veglia el dentant betg:
Insatgi ha ina giada ditg a mai: «Sche ti vegnias en il radio, sai jau suenter 10 secundas tgi che discurra – e lura poss jau gist serrar giu». Mia vusch ha pia avantatgs per tuts.