Siglir tar il cuntegn

Header

audio
Gerda Wissmeier-Gasser: «Ina istorgia fitg emoziunala»
Or da Actualitad dals 25.11.2019.
laschar ir. Durada: 02:13 minutas.
cuntegn

Suenter votaziun da fusiun Engulà la tavla dal vitg da Haldenstein

Igl è stà fitg stretg a la radunanza communala dal venderdi saira: 253 vuschs per e 251 vusch cunter la fusiun cun Cuira. E gia sonda bun'ura era ina da las tavlas dal vitg da Haldenstein sparida. Ma quai n'è betg il sulet: i ha era dà disfamaziuns via telefon.

tavla dal vitg che consista be or dal rom senza tavla cun num dal vitg
Legenda: Dapi sonda bun'ura suenter la votaziun per ina fusiun cun Cuira è la tavla dal vitg sparida. RTR, Guadench Dazzi

Ella na possia insumma betg metter a lieu quai, di la presidenta communala, Gerda Wiessmeier-Gasser. Tiers la tavla sparida saja anc vegnì ch'insatgi haja disfamà fermamain sia mamma al telefon e quai anonim.

I mussa simplamain che l'entira istorgia è stada fitg fitg emoziunala. Ma la decisiun stat e quella è d'acceptar tant d'ina sco da l'autra vart.
Autur: Gerda Wiessmeier-Gasserpresidenta communala

La presidenta communala ha sperà ch'i na dettia betg in uschè stretg resultat perquai ch'ella ha quintà ch'i vegnia lura grev. Omaduas varts hajan numnadamain cumbattì fitg ferm per lur posiziun. Tuttina spera ella che la situaziun sa quieteschia proximamain.

Speranza metta Gerda Wissmeier-Gasser er en in apero en il rom da la debatta da budget il december. Quel vegnia sapientivamain offrì da la vischnanca tant als adversaris sco als aderents da la fusiun. Cun la finamira dad ir a partir da là puspè tuts ensemen en l'avegnir.

RTR actualitad 06:00