Siglir tar il cuntegn

Ulteriur Grischun Sustegn per Martullo-Blocher tar la Ems

Suenter l’elecziun da Magdalena Martullo-Blocher sco Cussegliera naziunala survegn la direcziun da l'Ems sustegn da Markus Kremmel. Scheffa resta vinavant Martullo-Blocher. Quai ha communitgà l’interpresa a chaschun da la preschentaziun da las cifras dals ultims 9 mais.

Magdalena Martullo Blocher
Legenda: Ils 18 d'october 2015 è Magdalena Martullo-Blocher vegnida elegida sco Cussegliera naziunala. Keystone

Il nov commember da la direcziun, Markus Kremmel, lavura gia dapi 31 onns tar la Ems en differentas posiziuns directivas. Ses nov pensum cumenza Kremmel il prim da schaner 2016. Uschia duaja Martullo-Blocher avair il spazi liber necessari per sia lavur politica, communitgescha l'Ems.

Scheffa e Cussegliera naziunala

La nova Cussegliera naziunala Magdalena Martullo Blocher è optimistica da dumagnar politica e fatschenta sut in chapè.

Trair a niz l'experientscha dal bab

Tuttina, manar in'interpresa globala cun radund 1’000 emploiads e dasperas politisar en il Cussegl naziunal, quai munta blers termins e pretenda ina buna coordinaziun. Per che quai gartegia, veglia ella forsa er dumandar ses bab Christoph Blocher ina u l'autra giada per cussegl, uschia Martullo-Blocher envers RTR. La finala haja quel fatg quai cun success ed a moda effizienta durant 30 onns.

L'Ems-Chemia è gia organisada bain

Sco quai che Martullo-Blocher ha ditg vinavant, haja ella constatà che ses bab haja gia organisà bain la fatschenta, uschia ch’ils impurtants termins da fatschenta na sa cruschian betg cun ils termins da sessiun.

Pretschs bass e franc ferm engrevgeschan l'Ems

La gruppa Ems ha pudì augmentar ils emprims 9 mais la vendita per 8% en cumparegliaziun cun l’onn avant. La svieuta è sa sminuida per 3,1%, sin 1,445 milliardas francs. L'onn passà muntava la svieuta anc a 1,49 milliardas francs.

Gudogn tras martgads europeics ed americans

Las cifras repassadas en valutas localas mussan dentant in gudogn da 4,3% en cumparegliaziun cun l’onn avant, scriva la Ems holding SA. Surtut bain sajan sa sviluppads ils martgads en ils Stadis Unids ed en l'Europa. Ils proxims saja dentant da quintar cun in plaun svilup da la conjunctura globala senza gronds impuls per ina creschientscha, uschia la gruppa Ems.

RR novitads 08:00