La suprastanza da la citad aveva proponì al parlament da sustegnair la Expo Cuira SA ch'organisescha la HIGA cun 208'000 francs. 144'000 francs avess l'interpresa survegnì per indemnisar ils expositurs ch'avevan gia pajà ils custs per il stan a la HIGA 2020 ch'è vengida stritgada. Ulteriurs 64'000 francs avess l'organisatur da la HIGA survegnì à fonds perdu.
Mintga summa ha duvrà ina votaziun
Als 144'000 francs han 11 parlamentaris ditg na e 10 han sustegnì la dumonda. Tar la summa à fonds perdu hai lura dà 12 giadas in na, 7 giadas in gea e dus parlamentaris èn s'abstegnids da la vusch.
En spezial las partidas burgaisas èn sa messas cunter il sustegn da la citad per la Expo Cuira SA . La partida socialdemocratica era cleramain persuenter.
HIGA tutgada dal coronavirus
L'exposiziun da commerzi, industria e mastergn 2020 è stada ina da las emprimas occurrenzas ch'ins ha stuì annullar pervi dal coronavirus. L'exposiziun avess gì lieu la fin mars da quest onn. Questa annullaziun andetga da la fiera ha tenor la Expo Cuira SA chaschunà ina perdita da radund 800'000 francs.
