Il sviament da Claustra datti pir dapi 14 onns, ins ha ussa dentant gia da cumbatter cun gronds donns vid vias e paraids. Pertutgada il pli ferm è la part dal tunnel da Gotschna. Quel sto gia ussa vegnir sanà a l'engronda per 25 milliuns francs.
Il 9 da december 2005 è il sviament vegnì inaugurà da l'anteriur cusseglier federal Moritz Leuenberger e dal prinzi Charles. La finamira dal tunnel è da pudair distgargiar il lieu da turissem Claustra dal traffic. Da lez temp discurrivan ins anc d'ina nov'era.
In mineral chaschuna donns
Il plaschair è dentant stà mo da curta durada. Dapi la primavaira 2019 è il tunnel puspè in plazzal da construcziun. I haja dà sfessas e bots en las vias e paraids, declera Marco Ronchetti da l'Uffizi federal da vias. Ils emprims donns han ins vis gia suenter 8 onns, entant èsi vegnì anc mender. Il motiv per ils donn è in mineral cun il num «anidrid». Quai mineral reagescha numnadamain cun l'aua en la muntogna. Tar la reacziun sa furma gip e quest gip s'extenda. Tras la pressiun da quest gip smatga el encunter il betun ed ils conducts.
Ord l'archiv da RTR
RR novitads 17:00