La staziun dal tren a Tavau Vitg sto vegnir renovada, per adattar quella als basegns da persunas cun impediment. En quest rom duain era gist autras dumondas sco il traffic enturn la staziun vegnir schliadas.
La vischnanca da Tavau, la Viafier retica, las Pendicularas Tavau Claustra e la Societad d’immobiglias consum Tavau, èn sa cunvegnids durant planisar la renovaziun da la staziun, da sviluppar vinavant il project e da spustar la staziun per 400 meters. Il num dal project è «Project da generaziun staziun Vitg – Seehofseeli». Ils involvids han suttascrit ina decleraziun d’intenziun correspundenta.
Damain dischurden sin las vias
Necessaria è la renovaziun da la staziun a Tavau Vitg, per correspunder a la lescha davart l’egualitad da persunas cun impediments. Dentant i dat er problems da traffic sin las vias da Tavau. Tranter la staziun e la funiculara Parsenn hai adina puspè colonnas pervi dal bler traffic a pe e da vehichels. Quai vulan ils partenaris schliar cun spustar la staziun. Il tren tegness lura directamain en la vischinanza da la staziun da val da la funiculara Parsenn. Vitiers vul la vischnanca da Tavau era rinforzar cun quest project il svilup da l’abitar, dal turissem e dal commerzi.
Sco proxim pass vulan la vischnanca, la Viafier retica ed ils auters involvids includer ils proprietaris da terren vischins en il project. Emprimas infurmaziuns pli detagliadas per la populaziun èn previsas per la stad che vegn. La primavaira 2022 duai il suveran da Tavau lura pudair prender posiziun davart las midadas enturn la staziun a Tavau Vitg.
