Tarzisius Caviezel, il landamma da Tavau, ha «grond plaschair da questa decisiun clera» da ses suveran tar in nov reglament per sustegnair finanzialmain il WEF.
Uss saja da cuntinuar cun las diversas lavurs, ch'els hajan prendì enta maun per pudair ameglierar ils puncts critics enturn il WEF – sco per exempel quel da reducir ils camiuns sin la promenada u da chattar ina soluziun per las radund 3'000 limusinas che curseschian en vischnanca.
Clav da repartiziun resta, summa s'augmenta
Cun la decisiun clera da questa dumengia è sa declerada pronta la vischnanca da Tavau da surpigliar vinavant 1/8 dals custs per la segirezza dal Forum mundial d'economia WEF (CH 3/8, WEF 2/8, GR 2/8, Tavau 1/8). Cun quai ch'il tet dals custs era vegnì auzà da 8 sin 9 milliuns importa il 1/8 uss nov 1,125 milliuns francs.
Votaziun necessaria pervi che cunvegna actuala era a fin
La votaziun era vegnida necessaria perquai che la cunvegna dals custs per la segirezza dal 2009 va a fin quest onn. Sinaquai avevan la Confederaziun, il chantun, il WEF e la vischnanca da Tavau elavurà in nov concept per ils onns 2019 fin 2021. Cun il Gea dal suveran da Tavau è quel ussa valaivel.
Populaziun da Tavau segua a ses parlament
Gia per la suprastanza (Kleiner Landrat) ed il parlament da Tavau (Grosser Landrat) predominavan ils effects positivs dal Forum mundial d'economia per l'economia locala. En consequenza aveva il parlament da Tavau vuschà cun 15:1 per la varianta ch'è vegnida acceptada uss er da la populaziun.
Terz Gea da populaziun a co-finanziaziun dal WEF
Cun ses Gea als custs augmentads votescha il suveran da Tavau gia la terza giada cun maioritad clera a favur dal WEF – l'onn 2009 avevan ditg 62,7% da la populaziun Gea, l'onn 2003 perfin 67,8%.
RR novitads 12:00+
