Taxito funcziunescha uschia sco far autostop, dentant tut digitalisà. Enstagl da tegnair ora il polesch e tegnair in chartun cun scrit si la destinaziun giavischada, cumpara il num da la destinaziun sin ina tabla digitala visibla per ils automobilists che passan. En las valladas perifericas dal chantun Lucerna datti la purschida dapi trais onns e là è Taxito sa cumprovà. La finamira da quest servetsch è da porscher dapli colliaziuns en valladas che n’han betg ina buna rait dals meds da transport publics.
Fasa da test tranter Maladers e Cuira
Il chantun Grischun è stà da l'avis ch'era bleras regiuns muntagnardas pudessan profitar da questa purschida. Perquai ha il chantun contactà Taxito. L'iniziant da Taxito, Martin Beutler è da l'avis che Taxito ha potenzial en il Grischun cunzunt pervi da la topografia: Las valladas sajan definidas cler. Plinavant saja la glieud averta ed i dettia paucs meds publics.
Cun la finamira da colliar meglier regiuns muntagnardas datti en il Grischun ina fasa da test cun Taxito. Quella vegn fatga tranter Maladers e Cuira, cunquai ch’i dat là bler traffic individual e pauc traffic public. Sin quest traject èsi vegnì installà differentas fermadas da Taxito. La fasa da test cumenza ils 10 da december 2019 e cuzza trais onns. Durant quest temp vali da mirar sche automobilists e pendularis fan diever da Taxito.
Sche la fasa da test haja success fissi d'examinar en tge regiuns dal Grischun ch'ins veglia introducir a lunga vista il nov med da transport. Plinavant possian las vischnancas era mussar ord atgna iniziativa lur interess vid Taxito.
Nagina alternativa per ils meds publics
Erich Büsser, manader da l'Uffizi chantunal per energia e traffic explitgescha ch’i na duaja betg esser ina alternativa per ils meds publics.
Cun Taxito vulain nus preschentar ina ulteriura purschida. Ils meds publics na vegnan betg reducids. Quai ha fin ussa adina puspè starmentà la glieud.
Il cas che Maladers haja da basegns d’in schlargiament dal traffic public lura vegnia quai era fatg, declera Büsser vinavant.
RR actualitad 11:00