Siglir tar il cuntegn

Header

cuntegn

Taxito Nov med da transport per regiuns perifericas

Malas colliaziuns e spetgar ditg fin ch’il proxim bus u tren arriva: In problem che persunas en valladas perifericas enconuschan bain. In project cun il num «Taxito» vul far frunt a quest problem. A Lucerna è la purschida da Taxito sa cumprovada. Ina fasa da test cumenza uss er en Grischun.

Taxito funcziunescha uschia sco far autostop, dentant tut digitalisà. Enstagl da tegnair ora il polesch e tegnair in chartun cun scrit si la destinaziun giavischada, cumpara il num da la destinaziun sin ina tabla digitala visibla per ils automobilists che passan. En las valladas perifericas dal chantun Lucerna datti la purschida dapi trais onns e là è Taxito sa cumprovà. La finamira da quest servetsch è da porscher dapli colliaziuns en valladas che n’han betg ina buna rait dals meds da transport publics.

Co funcziuna Taxito? – Sumegliant ad in autostop digital

Personen-Box aufklappenPersonen-Box zuklappen

Mintga persuna che posseda in telefonin po ir tar ina staziun da Taxito. Da là trametta ella in SMS cun la destinaziun nua ch'ella vul ir ad in numer da telefon. La destinaziun cumpara lura immediat sin la tabla da la staziun ch'è visibla per ils automobilists che charreschan sperasvi. Tgi che va en la dretga direcziun po lura – sch'el vul – prender cun il passagier.

In viadi custa dus francs. In franc per il chauffeur ed in franc survegn l'interpresa Taxito. Per garantir la segirtad dal transport trametta mintga passagier il numer da l’auto per SMS a Taxito.

Fasa da test tranter Maladers e Cuira

Il chantun Grischun è stà da l'avis ch'era bleras regiuns muntagnardas pudessan profitar da questa purschida. Perquai ha il chantun contactà Taxito. L'iniziant da Taxito, Martin Beutler è da l'avis che Taxito ha potenzial en il Grischun cunzunt pervi da la topografia: Las valladas sajan definidas cler. Plinavant saja la glieud averta ed i dettia paucs meds publics.

Cun la finamira da colliar meglier regiuns muntagnardas datti en il Grischun ina fasa da test cun Taxito. Quella vegn fatga tranter Maladers e Cuira, cunquai ch’i dat là bler traffic individual e pauc traffic public. Sin quest traject èsi vegnì installà differentas fermadas da Taxito. La fasa da test cumenza ils 10 da december 2019 e cuzza trais onns. Durant quest temp vali da mirar sche automobilists e pendularis fan diever da Taxito.

Sche la fasa da test haja success fissi d'examinar en tge regiuns dal Grischun ch'ins veglia introducir a lunga vista il nov med da transport. Plinavant possian las vischnancas era mussar ord atgna iniziativa lur interess vid Taxito.

Nagina alternativa per ils meds publics

Erich Büsser, manader da l'Uffizi chantunal per energia e traffic explitgescha ch’i na duaja betg esser ina alternativa per ils meds publics.

Cun Taxito vulain nus preschentar ina ulteriura purschida. Ils meds publics na vegnan betg reducids. Quai ha fin ussa adina puspè starmentà la glieud.
Autur: Erich Büssermanader da l'Uffizi chantunal per energia e traffic

Il cas che Maladers haja da basegns d’in schlargiament dal traffic public lura vegnia quai era fatg, declera Büsser vinavant.

RR actualitad 11:00