Siglir tar il cuntegn

Header

audio
L'uniun da musica da Panaduz
Or da Actualitad dals 13.08.2020.
laschar ir. Durada: 02:36 minutas.
cuntegn

«Tes vitg – tia istorgia» «Senza la musica na dessi probablamain nagina processiun pli»

La societad da musica è vegnida fundada il 1855. Dapi lura è ella fitg impurtanta per la vita sociala dal vitg. Gieri Cathomen stat dapi il 2001 a Panduz ed il 2007 è el entrà en la societad e stà plirs onns president da la societad.

La societad da musica da Panaduz ha passa 30 commembers ed è vegnida fundada l'onn 1855 uschia ch'ella è er la pli veglia musica en il vitg. Spezial è che bun la mesadad discurran rumantsch. Tranter Auter er Gieri Cathomen ch’è plirs onns stà al timun da la societad. El enconuscha la societad e sa tge impurtanza che quella ha en il vitg.

video
«Senza la musica na dessi probablamain nagina processiun pli»
Or da RTR Social dals 14.08.2020.
laschar ir

Senza la musica, nagina processiun

La societad da musica saja in'impurtanta pitga da la vita culturala dal vitg. Tar grondas festas dal vitg saja la societad adina preschenta e procuria per buna luna cun sia musica. Era plirs concerts datti l’entir onn ora che porschan divertiment per in grond public. Tenor Gieri Cathomen saja la processiun da Sontgilcrest in dals highlights. El manegia schizunt ch’i na dettia nagina processiun pli sche la societad da musica na sunass betg pli a l’occurrenza. Grazia a la musica na vegnissan betg mo las persunas che van per ordinari adina en baselgia, mabain dettia bleras famiglias e persunas da tuttas annadas.

Sche la musica na sunass betg pli, na dessi forsa era nagina processiun pli.
Autur: Gieri Cathomencommember da la societad da musica a Panaduz

Bellas regurdientschas

Dapi l’entrada l’onn 2007 ha el savì far bellas experientschas cun la societad. E gugent sa regorda el vid quellas. Per exempel haja la societad sunà a la festa da musica districtuala a Lai avant circa 4 onns e là hajan els gì grond success. Ed in’emna pli tard sajan els ids a la festa da musica federala a Montreux nua ch’els hajan sunà anc meglier.

Nus avessan mai pensà che nus savain anc ina giada surpassar quest nivel aut.
Autur: Gieri Cathomencommember da la societad da musica a Panaduz

Era sch’el ha bleras bellas regurdientschas datti era chaussas che fan quitads. Sco mintg’autra societad da musica hajan era els difficultads da recrutar novs commembers. El manegia dentant che la societad vegn era ad exister en il futur.

RTR actualitad 11:00

Artitgels legids il pli savens

Scrollar a sanestra Scrollar a dretga