Siglir tar il cuntegn
Inhalt

Ulteriur Grischun Tractament manglus da dumonda da natiralisaziun a Trimmis

Il tribunal federal ha renconuschì in recurs d'in um dal Iran. A l'um veva la vischnanca da Trimmis refusà il dretg da burgais.

Il bajetg dal Tribunal federal a Losanna.
Legenda: Il Tribunal federal pretenda che Trimmis tractia anc ina giada la dumonda da daventar burgais. Keystone

Tenor il tribunal federal haja la vischnanca da Trimmis tralaschà la lavur formala sco era materiala tar l'impatriaziun. Suenter in discurs da radund 10 minutas aveva Trimmis refusà a l'Iranais il dretg da burgais.

Retratg la dumonda suenter squitsch dal cussegl

En quel discurs da 10 minutas haja il cussegl dals burgais surtut persvadì l'um ch'el duai retrair sia dumonda. Quai cun la remartga ch'il cussegl vegnia uschigliò a far la proposta da refusar la dumonda.

L'um ha suenter ina consultaziun tar in advocat confermà ch'el restia tar sia dumonda e veglia daventar burgais da Trimmis. Sinaquai ha la radunanza refusà la dumonda. Quai cun l'argument che l'um na saja betg integrà en vischnanca, el n'haja naginas relaziuns socialas en vischnanca e na fetschia betg part d'uniuns u autras instituziuns localas.

Tribunal chantunal aveva confermà decisiun da Trimmis

Il Tribunal administrativ dal Grischun aveva silsuenter confermà la decisiun da la vischnaunca. Quai cun attestar ch'ils criteris per la decisiun sajan vegnids fixads correctamain e sa basian sin l'integraziun.

Tenor Tribunal federal procedura manglusa

Il discurs saja gia stà manglus formalmain ed il cussegl na saja betg s'infurmà avunda. Il tribunal puntuescha però che tant l'invit, il discurs sco era ils scleriments che la vischnanca haja fatg sajan stads manglus.

RR novitads 20:00