Pikachu è probablamain in dals pli renumads Pokémons. Il pitschen monster mellen charin cun vistas cotschnas ed ina cua en furma da cametg. Cun il gieu «Pokémon Go» as po uss ir a chatschar pikachu e ses passa 150 collegas monsters da l'univers da Pokémon.
Ins sto be prender il telefonin ed ir a spass. L'applicaziun mussa cura ch'in Pokémon virtual è damanaivel e lura ston ins be guardar sin il visur dal telefonin, focussar là il pitschen monster e tutgar el cun ina balla. «Quai è legher e fa spass dad ir a la tschertga da pokémons», di in giugader en la Poststrasse. In ch'è sin via sin l'Arcas di: «Igl è simplamain fatg gail, ins sto ir giuador, spetgar a chasa sin ch'in pokémon vegn, lura na vegnan ins betg enavant cun il gieu». Ultra da quai, sajan ils pokémons propi anc «charins», di ina giugadura.
«Quai è mia uffanza»
Ils vairs fans da Pokémon èn simpel d'identifitgar, ils blers han numnadamain tranter 20 e 30 onns. Quella generaziun che ha giugà sez dals onns novanta l'emprim gieu da Pokémon sin il gameboy ubain guardà la seria da televisiun. E quai è per blers lura er il motiv da giugar «Pokémon Go»: «Per mai è quai simplamain mia uffanza». In auter motiv pertge ch'il gieu vegn dà uschè bler è: El è divertent. Perquai ch'i ha propi quasi dapertut Pokémons – sin il canapé a chasa, sin l'auto, en il restaurant, gea schizunt en stizun … Il programm metta simplamain casualmain Pokémons virtuals in zichel dapertut.
Quai è dentant betg mo divertent, mabain po er esser problematic. Per exempel dat quai lura er Pokémons en lieus sco ad Auschwitz ubain en il Holocaust Memorial Museum a Washington. Respectivamain: I dat glieud che ha tschertgà en quels lieus cun il telefonin Pokémons. Il museum ha purtà plant cunter ils creaders dal gieu ed il lieu ha pudì vegnir stritgà da la carta virtuala da Pokémons.
In nov segment da clientella
Blers pokémons as chatta tar pokéstops, quai èn posts nua ch'ils giugaders pon guadagnar insatge. E nua ch'igl è in stop, n'è in giugader era betg lunsch. En l'America tiran numerus cafés datiers da pokéstops a niz quai fatg: Els offereschan per exempel cafés gratuits sch'ins peglia en l'agen restaurant in dals pitschens monsters.
Ed er a Cuira dat quai numerus pokéstops. dus da quels èn sin l'Arcas. Ils dus restaurants, il Café Arcas da Linus Caduff ed il Metzgertor da Katharina Jenny n'han dentant anc betg pensà vid ina tala strategia per carmalar ils giugadurs da pokémon. «Dentant l'idea è buna», di Linus Caduff.
RR actualitad 11:00